Klabu ya Chelsea FC iko karibu rasmi kukamilisha usajili wa chipukizi wa Kiitaliano Marco Palestra baada ya makubaliano ya mdomo kufikiwa kati ya pande zote zinazohusika. Taarifa za hivi karibuni zinaeleza kuwa Atalanta BC itapokea zaidi ya euro milioni 55 pamoja na kipengele cha asilimia ya mauzo ya baadaye (sell-on clause), huku mchezaji huyo akisaini mkataba wa muda mrefu.
Palestra mwenye umri wa miaka 21 anachukuliwa kuwa mmoja wa mabeki wa pembeni wenye vipaji vikubwa zaidi nchini Italia. Alivutia wengi kwa kiwango chake bora wakati wa mkopo wake katika klabu ya Cagliari Calcio msimu uliopita. Ana uwezo wa kucheza pande zote mbili za uwanja, lakini nafasi yake bora zaidi ni Right Wing-Back (RWB).
Kinachovutia zaidi katika dili hili ni kwamba Chelsea imefanikiwa kuiteka saini yake licha ya Inter Milan kuonekana kuwa mbele kwa muda mrefu katika mbio za kumsajili. Hata hivyo, mazungumzo ya haraka pamoja na ushawishi wa kocha mpya Xabi Alonso yalibadilisha mwelekeo wa makubaliano hayo, na kumfanya mchezaji huyo kuchagua kujiunga na Stamford Bridge.
Usajili wa Palestra unaweza kuwa miongoni mwa dili kubwa zaidi za Chelsea katika dirisha hili la usajili, huku klabu hiyo ya London ikiendelea na mpango wake wa kujenga kikosi kipya chini ya uongozi wa Xabi Alonso.
